Избран нов Извршен одбор на САЗ „Аксиос“

Денес, 17.10.2018, во Библиотеката при Институтот за историја на уметноста и археологија на Филозофскиот факултет во Скопје се одржа Годишно собрание на Студентското археолошко здружение „Аксиос“, на кое, покрај другите прашања на дневен ред, беше избрано и новото раководство на Здружението.

За членови на Извршниот одбор на САЗ „Аксиос“ беа избрани:
1. Симона Силјаноска – претседател
2. Дарко Јованоски – потпретседател
3. Иван Малезанов – секретар
4. Ивана Вучиќ
5. Владимир Таневски

Студентското археолошко здружение „Аксиос“ продолжува со своите активности и стремежи во насока на поголемо учество на студентите во развојот и промоцијата на археологијата, историјата на уметноста и културното наследство во нашата држава.

Очекувајте информации за нови активности во скоро време!

Advertisements

„Тема:Не“ во Музеј на Македонија (Фото Галерија)

Заврши “Тема:Не”, но ние не завршуваме тука!

Благодариме на сите посетители и учесници: историчари на уметноста, археолози, класичари, етнолози, филозофи, историчари, психолози, дефектолози, социолози, сликари, вајари, графичари, поети, актери, музичари, рејвери, металци, млади, стари. “Тема:Не” беше посветен на Вас – активните учесници во културата.

Се надеваме дека ќе имаме можност да се гледаме и соработуваме на многу идни настани, а зошто да не и на второ издание на “Тема:Не”.

Во продолжение погледнете ја фото-галеријата од настанот. 🙂

Continue reading “„Тема:Не“ во Музеј на Македонија (Фото Галерија)”

„НЕ!“ за пасивноста во културата

 „Не“, „Не може“, „Немаме“ – ова се некои од најчестите одговори кои ги добиваат младите кога сакаат да организираат нешто, особено кога се работи за културни и уметнички настани. Институциите често „немаат пари“, а луѓето „немаат време“ или „не им е гајле“. Но, дали всушност културата и уметноста во нашата држава патат повеќе од самонаметната пасивност отколку навистина од немање пари и време?

Ова прашање си го поставивме и ние, одговарајќи со едногласно „Не!“ на пасивноста во културата. Имено, овој викенд од 1 до 3 јуни, во НУ Музеј на Македонија, „Аксиос“ го организира тридневниот културно-уметнички настан „Тема: Не!“ кој има за цел да ги поттикне младите на културна активност и ќе вклучува проекција на филмови, јавни дебати, музички настапи, поетска вечер и изложба на ликовни дела.

Како идни активни учесници во сферата на археологијата и историјата на уметноста, ние студентите од „Аксиос“ веруваме дека треба да имаме поширока одговорност во градењето на нашето општеството. Работниците во полето на културата се личности кои треба да даваат придонес во развојот на заедницата. Од тука тргнавме да организираме настан кој ќе ги собере сите млади од полето на општествените и културно-уметничките насоки на едно место, да ги срушиме бариерите и да се спротивставиме на пасивноста во културата.

Покрај членовите на „Аксиос“ кои го организираат и финансираат целиот настан без помош од институции, фондови или компании, на целосно волонтерска база се приклучија и околу 40 други учесници во подготовката на содржините – етнолози, класичари, историчари, филозофи, дефектолози, психолози, графичари, сликари, вајари, глумци, поети, музичари, сите на едно место и со иста цел – да кажат „НЕ“ за пасивноста во културата.

Целосната програма на настанот во продолжение:

Ден 1 (Петок – 01.06.2018)

17:00 – 20:00 – Рецепција на антиката во современата уметност – проекција на филмот “The Name of the Rose” (1986) и презентација „Антиката во филмскиот серијал Хари Потер“
20:00 – 21:00 – Јавна дебата „Често поставувани прашања и негативни одговори“ – отворена дискусија за предизвиците во развојот на културата и уметноста во Македонија и светот и нивното влијание во општеството.
21:00- 00:00 – Музички DJ сет на Oubli

Ден 2  (Сабота – 02.06.2018)

17:00 – 19:00 – Проекција на кратки етнолошки филмови – во организација на Македонското студентско етнолошко-антрополошко друштво.
19:00 – 21:00 – Јавна дебата „Толеранционен логор“ – отворена дискусија посветена на цензурата, толеранцијата и дискриминацијата во општеството, уметноста и науката.
21:00 – 00:00 – Музички концерт на младиот метал бенд Conspiracy.

Ден 3  (Недела – 03.06.2018)

18:00 – 19:00 – Дискусија: „Елитизмот во уметноста“ – отворена јавна дебата за елитизмот во визуелната уметност и нејзината достапност до популацијата со нарушен вид (проследена со соодветна изложба на тактилни уметнички дела). Модерирана од членови на Студентското археолошко здружение „Аксиос“ во соработка на студенти од институтот за Дефектологија и студенти од Факултетот за ликовни уметности.
19:00 – 21:00 – Отворена поетска вечер
21:00 – Oтварање на изложба на дела во авторство на студенти од Факултетот за ликовни уметности

Потпишан меморандум за соработка помеѓу Студентското археолошко здружение „Аксиос“ и Националната установа Стоби

На 16.05.2018 година, во просториите на Националната установа за управување со археолошкиот локалитет Стоби, беше потпишан Меморандум за соработка помеѓу Студентското археолошко здружение „Аксиос“ – Скопје, претставувано од претседателот Игор Ефтимовски, и Националната Установа Стоби, претставувана од директорот м-р Мишко Тутковски.

Заснован врз принципите на еднаквост и реципрочност, Меморандумот ќе претставува рамка за идната соработка помеѓу двете страни во насока на организација и реализација на заеднички проекти, научни и студентски конференции, обуки, летни школи, едукативни кампови, семинари, работилници, изложби, промоции и трибини.

Во моментот, членови на Студентското археолошко здружение „Аксиос“ учествуваат во теренски истражувања на комплексот објекти околу храмот на Изида во Стоби предводени од раководителот м-р Јован Радњански од НУ Стоби, и во изработката на дигитална документација на откриените ситуации во соработка со претставници од Универзитетот Квинс од Канада.

Отворен повик за трудови за третиот број на меѓународното студентско списание “Axios”

Драги колеги,

Повикот за пријавување на трудови за третиот број на меѓународното електронско списание за студентски стручни трудови од областа на археологијата, историјата на уметноста и културното наследство “AXIOS”, во издаваштво на Студентското археолошко здружение „Аксиос“ од Скопје, е отворен. Крајниот рок за пријавување на трудови е 30 септември 2018 година. Третиот број на списанието “AXIOS” ќе биде публикуван во периодот ноември/декември 2018 година.

Право за пријавување на трудови имаат сите активни студенти кои имаат запишано додипломски или постдипломски студии. При пишувањето на трудовите, авторите треба да се придржуваат кон вообичаените правила и стандарди за пишување на стручни трудови (име и презиме на авторот, вид на студии (додипломски или постдипломски), факултет и универзитет на кој студира, контакт e-mail на авторот, наслов на трудот, апстракт на јазикот на кој е напишан трудот, клучни зборови, фусноти, библиографија и извори, илустрации и резиме на англиски јазик). Пријавените трудови не треба да надминуваат 16 страници текст, односно 20 страници со илустрации.

Електронската пошта на која треба да се испраќаат трудовите е: sazaxios@gmail.com.

За повеќе информации во врска со списанието и трудовите можете да нé контактирате преку e-mail или преку нашата официјална Facebook страница: https://www.facebook.com/sazaxiosskopje/.

Се надеваме на успешна соработка!

Дискусии за современата археолошка теорија во Археолошкиот музеј на Македонија (Фото Галерија)

Овој петок (09.10.2018), во Археолошкиот музеј на Македонија во Скопје се одржа настанот „Современа археолошка теорија“ во организација на Студентското археолошко здружение „Аксиос“ од Скопје, остварен како серија на предавања и дискусии поврзани со современите теориски и методолошки тенденции во археологијата и нејзините сродни науки, отстапувајќи им простор на помладите истражувачи и нивните размислувања на оваа тема.

Настанот беше составен од шест различни предавања преку кои говорниците ги изразија своите ставови поврзани со отворените прашања и насоки на развој на современата археолошка теорија и методологија.

Серијата на предавања беше отворена со излагањето на доц. д-р Гоце Наумов од Центарот за истражување на предисторијата на тема „Теорија без територија: за епистемологијата и пост-процесната археологија“. На прашањето Дали андроидите сонуваат електрични овци?“, односно за Археолошки дистопии во пикантен технолошки сос зборуваше доц. д-р Ирена Теодора Весевска од Филозофскиот факултет во Скопје, отворајќи сериозни прашања за иднината на човечкиот фактор во науката. Првиот дел од излагањата беше заокружен со предавањето на м-р Мишко Тутковски од Националната установа Стоби на тема Ранохристијански мозаици: анализи и интерпретации.

Втората етапа на предавања отпочна со Кристијан Тошески од Студентското археолошко здружение „Аксиос“ кој ја презентираше темата Кохерентна светлина: холограмите во археолошката средина, продолжувајќи со Кирил Денковски од Македонското археолошко научно друштво кој зборуваше за Примената на картографски методи во археологијата. Надоврзувајќи се на својот претходник, Ѓоре Милевски од Центарот за истражување на предисторијата го комплетира вториот циклус на предавања, осврнувајќи се на темата Географско-интелигентен сапиенс: Просторот и неговото место во археолошката теорија“.
Continue reading “Дискусии за современата археолошка теорија во Археолошкиот музеј на Македонија (Фото Галерија)”

Промоција на вториот број на меѓународното студентско списание за археологија и историја на уметноста “Axios” (Фото Галерија)

На 17 ноември 2017 година, во Конференциската сала при Археолошкиот музеј на Македонија во Скопје, јавно беше промовиран вториот број на меѓународното студентско списание за археологија и историја на уметноста „Axios“, во издаваштво на Студентското археолошко здружение „Аксиос“ од Скопје и потпомогнато од Министерството за култура на Република Македонија.

Вториот број на списанието е составен од петнаесет трудови во авторство на шеснаесет студенти кои доаѓаат од пет универзитети во три држави. За овој број, свои трудови приложија шест македонски студенти по археологија, историја на уметноста и историја од Универзитетот „Св. Кирил и Методиј“ – Скопје и Универзитетот „Гоце Делчев“ – Штип, додека пак странските студенти, десет на број, кои го збогатија списанието со нивни трудови доаѓаат од Универзитетот од Белград, Универзитетот од Приморска (Копер) и Универзитетот од Љубљана. Текстовите опфаќаат широк дијапазон на теми од класична археолошка методологија, па до симболички анализи, доцноантичка уметност и музеологија.

Списанието има за цел да ја поттикнува активната истражувачка дејност на студентите кои го изучуваат културниот развиток на човечката цивилизација низ вековите, да ја поттикнува нивната меѓусебна соработка и да претставува медиум преку кој тие ќе можат да ги публикуваат своите први научни размислувања.

Списанието е достапно бесплатно во електронска форма на официјалниот веб-блог на САЗ „Аксиос“, на нашиот Academia.edu профил, на Issuu и на Scribd.

Благодарност до Министерството за култура на Република Македонија, НУ Археолошки музеј на Македонија, Винарија Стоби и компанија Бако, до сите гости, колеги, поддржувачи и љубители на културата.

Continue reading “Промоција на вториот број на меѓународното студентско списание за археологија и историја на уметноста “Axios” (Фото Галерија)”